धनगढी, फागुन १७ – धनगढी उपमहानगरपालिका वडा नं. ८ स्थित एरिष्टो इङ्ग्लिस बोर्डिङ स्कुलले आफ्नो ३२औँ वार्षिकोत्सव तथा अभिभावक दिवस भव्य रूपमा सम्पन्न गरेको छ। शनिवार विद्यालयकी अध्यक्ष शान्ति अधिकारको सभापतित्वमा सम्पन्न कार्यक्रममा प्रमुख अतिथि सुदूरपश्चिम प्रदेश सभासद तथा पूर्व पर्यटन तथा वातावरण मन्त्री रमेशसिंह धामी रहेका थिए।
विद्यालयको वार्षिकोत्सवको अवसरमा विद्यार्थीहरूले विविध सांस्कृतिक प्रस्तुतिहरू, नृत्य, गीत, नाटक तथा अन्य मनोरञ्जनात्मक कार्यक्रम प्रस्तुत गरेका थिए। साथै, शैक्षिक तथा अतिरिक्त क्रियाकलापहरूमा उत्कृष्ट प्रदर्शन गर्ने विद्यार्थीहरूलाई पुरस्कार वितरण गरियो।
विद्यालयका प्रिन्सिपल हरि बुढाखोकी क्षेत्रीले वार्षिक प्रतिवेदन प्रस्तुत गर्दै शिक्षा नै समाज सुधारको प्रमुख आधार रहेको बताए। उनले एरिष्टो इङ्ग्लिस बोर्डिङ स्कुलबाट अध्ययन गरेका विद्यार्थीहरू विभिन्न क्षेत्रमा सफलता हासिल गरिरहेको उल्लेख गर्दै अभिभावकहरूलाई शिक्षा क्षेत्रमा गरिएको लगानीको प्रतिफल ढिलो भए पनि अवश्य प्राप्त हुनेमा ढुक्क रहन आग्रह गरे।
विद्यालयको शैक्षिक गतिविधि र गुणस्तरबारे बोल्दै वडा नं. ८ का वडा अध्यक्ष जुगुराम चौधरीले विविध जातजाति तथा संस्कृतिबाट आएका विद्यार्थीहरूलाई समान रूपमा शिक्षाको अवसर प्रदान गरिरहेको विद्यालयको प्रयास सराहनीय रहेको बताए।
प्रमुख अतिथि प्रदेश सभासद रमेशसिंह धामीले आफ्नो सम्बोधनमा गुणस्तरीय र आधुनिक शिक्षा आजको प्रमुख आवश्यकता भएको बताउँदै विद्यालयलाई अझ नवीनतम शिक्षण पद्धति अपनाउन सुझाव दिए। साथै, उनले विद्यार्थीहरूलाई कुलत तथा नकारात्मक प्रभावबाट जोगाउनु विद्यालयको पनि दायित्व भएको उल्लेख गरे।
कार्यक्रममा विभिन्न अतिथिहरू, अभिभावक, विद्यार्थी, शिक्षक-शिक्षिका, पत्रकार तथा स्थानीय समाजसेवीहरूको उल्लेखनीय उपस्थिति रहेको थियो।
सन् २०४९ सालमा स्थापना भएको एरिष्टो इङ्ग्लिस बोर्डिङ स्कुल हाल १,८०० विद्यार्थी तथा ७५ शिक्षक-शिक्षिकाहरूको सहभागितासहित उत्कृष्ट शैक्षिक वातावरण प्रदान गरिरहेको छ। विद्यालयले विद्यार्थीहरूको सर्वाङ्गीण विकासमा निरन्तर योगदान दिँदै आएको छ।
विद्यालयका प्रिन्सिपल क्षेत्रीले आगामी दिनमा विद्यालयलाई अझ उत्कृष्ट बनाउन अभिभावक, शिक्षक तथा विद्यार्थीहरूलाई मिलेर अगाडि बढ्न आह्वान गरे। कार्यक्रममा सहभागी अतिथिहरूले विद्यालयको प्रगतिप्रति सन्तोष व्यक्त गर्दै सफल भविष्यको शुभकामना व्यक्त गरे।
