धनगढी । फूलवारीको बेलि देखि २५ घर चोकसम्मको सडक खण्डमा ट्राफिक नियमलाई प्रभावकारी बनाउँदै दुर्घटना न्यूनीकरण गर्ने उद्देश्यले नयाँ ट्राफिक चिन्हहरू राखिएको छ। अस्थायी ट्राफिक प्रहरी पोस्ट इन्चार्ज सिद्धराज बिष्टको नेतृत्वमा सो काम गरिएको हो।
यस अन्तर्गत सडकमा ट्राफिक चिन्ह भएका बोर्डहरू जडान गरिएको छ, जसले सवारीचालकलाई गति नियन्त्रण, लेन अनुशासन, र मोडको सावधानी सम्बन्धी जानकारी दिनेछ। साथै, सवारी साधनहरूमा रिफ्लेक्टिभ स्टीकर टाँस्ने काम गरिएको छ, जसले रातको समयमा देखिने क्षमता वृद्धि गरेर दुर्घटना कम गर्न सहयोग पुर्याउने अपेक्षा गरिएको छ।
इन्चार्ज बिष्टका अनुसार, सडक सुरक्षाका लागि ट्राफिक नियम पालना गर्न सबैको सहयोग आवश्यक छ। यो कदमले चालक र पैदलयात्री दुवैलाई सचेत बनाउनेछ।
यस्ता प्रयासहरूबाट फूलवारीमा सवारी दुर्घटनामा कमी आउने र ट्राफिक व्यवस्थापन थप प्रभावकारी हुने विश्वास गरिएको छ।
