धनगढी: प्रधानमन्त्री कप टी–२० महिला क्रिकेट राष्ट्रिय प्रतियोगिताका लागि सुदूरपश्चिम प्रदेशले विन्दु रावलको कप्तानीमा १४ सदस्यीय अन्तिम टोली घोषणा गरेको छ।
सुदूरपश्चिम प्रादेशिक क्रिकेट संघका सचिव लक्ष्मणदत्त भट्टका अनुसार टोलीमा रितु कनौजिया, कविता कुँवर, शोभा रोकाया, करिश्मा थापा, जानकी थापा, रविना साउद, चेतना कुँवर, रेवती धामी, मञ्जु विष्ट, मनीषा बोहरा, रविना धामी, आशिका महरा र मनिषा खत्री समावेश छन्।
प्रशिक्षकको रूपमा नीरज चन्द, व्यवस्थापकमा पार्वती बोहरा, र फिजियो तथा सहायक प्रशिक्षकमा दीपेन्द्र बोहरा रहनेछन्।
सुदूरपश्चिम प्रदेशस्तरीय छनोट प्रतियोगिताबाट २० उत्कृष्ट खेलाडीलाई बन्द प्रशिक्षणमा सहभागी गराइएको थियो। बैतडीको दशरथचन्द क्रिकेट मैदानमा सम्पन्न प्रशिक्षणपछि उत्कृष्ट प्रदर्शन गर्ने खेलाडीहरूमध्येबाट टोली छनोट गरिएको अध्यक्ष वासुदेव जोशीले जानकारी दिए।
प्रधानमन्त्री कप महिला क्रिकेट प्रतियोगिता आगामी माघ १ गतेदेखि धनगढीमा सुरु हुने छ। यो प्रतियोगिता राष्ट्रिय खेलकुद परिषद्को कार्यक्रमअनुसार नेपाल क्रिकेट संघको आयोजनामा र सुदूरपश्चिम प्रादेशिक क्रिकेट संघको व्यवस्थापनमा सम्पन्न हुनेछ।
