धनगढी । धनगढी उपमहानगरपालिकाले शिक्षा क्षेत्रमा दीर्घकालीन योगदान पुर्याएका प्राध्यापक डाक्टर हेमराज पन्तलाई नागरिक अभिनन्दन गर्ने भएको छ।
डोटीको उच्चाकोटमा २०११ सालमा जन्मिएका पन्तले धनगढीलाई आफ्नो कर्मथलो बनाउँदै सुदूरपश्चिमको शैक्षिक विकासमा महत्त्वपूर्ण भूमिका निर्वाह गरेका छन्। पन्तले २०३७ सालमा कैलाली वाणिज्य क्याम्पस (हाल कैलाली बहुमुखी क्याम्पस) मा अध्यापन सुरु गरेका थिए।
२०४५ सालमा क्याम्पस प्रमुख बनेका पन्तले क्याम्पसको संरचनात्मक र शैक्षिक विकासमा ऐतिहासिक योगदान दिए। नगरप्रमुख गोपाल हमालका अनुसार, “पन्तले धनगढीको शिक्षा क्षेत्रलाई नयाँ उचाइमा पुर्याएका छन्, जसले हजारौं विद्यार्थीलाई प्रगतिशील शिक्षा र सीप प्रदान गरेको छ।”
पन्तले भारतबाट विद्यावारिधि प्राप्त गरेका छन्। उनले २०६६ सालसम्म क्याम्पस प्रमुखको रूपमा सेवा गरे। त्यसपछि महेन्द्रनगरमा सुदूरपश्चिमाञ्चल विश्वविद्यालयका रजिस्ट्रारका रूपमा चार वर्ष काम गरे।
शिक्षा क्षेत्रको यो उल्लेखनीय योगदानको सम्मानस्वरूप धनगढी उपमहानगरपालिकाले उनलाई नागरिक अभिनन्दन गर्ने घोषणा गरेको हो। उपमहानगरको यो कदमले शिक्षा क्षेत्रमा योगदान पुर्याउने अन्य व्यक्तित्वहरूलाई समेत प्रेरित गर्ने विश्वास गरिएको छ।
